جدتي

الاسم قمر والوصف كمان

قمر واحلى من البدر ليلة التمام

ست جدعه والناس كلها تشهدلها 

شايله الحمول والمسؤوليه من صغرها

***

كانت في معهد الموسيقى من أكفاء المعلمات

 تربويه صح وفي التدريس من الممتازات

اتخرج من تحت ايديها فنانين وفنانات 

وكان ليها نصيب كبير من التكريمات

ليها مواقف متتنسيش مع الزميلات

الكل يحبها ويحترمها حتى الفرّاشات 

ست عظيمه وتعبت كتير عشان تربي البنات 

***

من صغرها نشيطه وتحب الرحلات

ولما كبرت شويه اتفوقت في إدارة الحفلات

ربنا أكرمها بإنسان جدع يحبها ويعيشها في تبات ونبات 

ورزقهم بالذريه الصالحه من الولاد والبنات

العيشه كانت هاديه ومفيش مجال للخلافات

بالحب والتفاهم عاشت معاه واتغلبوا على كل المشكلات

وكان نصيبها تكمل حياتها لوحدها مع الذكريات 

ولانها ست جدعه قدرت تقف في وش الأزمات

وقالت يارب قدرني اكون قد المسؤوليات

ووفقني في تربيتهم وتعليمهم واجوزهم احسن الجوازات

علمت الأولاد احسن تعليم وبقوا في الشغل نسخه منها

يشتغلوا بضمير ويساعدوا الناس كلها

في التربيه الناس بتتعلم منها

وفي الخبره مفيش احسن منها 

تتكلم وتحكي حواديت للاحفاد كلها

شاطره في المطبخ وبتلم الناس عندها 

كل جمعه الملوخيه والفراخ المحمره للعيله كلها

يجعله عامر ويفضل مفتوح بحسها

***

من حظنا الجميل اننا كنا قريبين منها

من واحنا صغيرين ماما بتسبنا عندها

نقعد الأجازة كلها لعب وهزار وفرفشه

نصحى كل يوم على البطاطا المولعه 

والقراقيش  في الفرن ريحتها مفحفحه

ألبومات الصور بالذكريات مليانه

تقعد تحكيلنا عن كل صوره حكايه

ايام جميله بالحب والدفا مليانه

***

"جدتي العزيزه "

بعد الوصف البسيط جدا ليكي 

واللي اكيد مش هيكفيكي  

انا عاوزه اقولك اني محظوظه جدا بيكي 

ومحظوظه كمان اني كان ليا نصيب كبير فيكي

طفولتي وشبابي كانوا معاكي

وان شاء الله على طول وياكي 

ومهما اتكلمت وقولت مفيش حاجه هتكفى

الحب والحنيه والامان اللي فيكي

ومتشكره جدا انك عن جدو حكيتيلي 

وعرفتيني أد ايه كان راجل عظيم وحنين عليكي

***

ربنا يخليكي لينا ودايما تكوني وسطينا

ويكرمك في العمره وعند سيدنا النبي ماتنسينا

من دعواتك الغاليه يارب ماتحرمينا

احلى حاجه في حياتنا زي القمر في ليالينا

نورك حاضر في حياتنا وفي كل مكان حوالينا 

يارب تقضى ايام جميله عند سيدنا النبي وترجعي لينا

تملى حياتنا دفا وحب وتكوني حوالينا

ومن حكاياتك تعلمينا ومن خبرتك تدينا

ربنا يكرمك بدعواتك لينا 

ويرضى عنك ويفرحك بينا 

مفيش سمكه بتعشق حوت

الساعه: السادسه والنصف صباحا. المكان: واقفه في البلكونه.

الحاله العامه: ماسكه مج الشاي وبسمع "عاشق سارح في الملكوت" وبتفرج على العصافير على الشجر اللي قدامي على طول ، السما صافيه ودا شيء مبهج اصلا وفي طيارة نفاثه من اللي بتعمل خطوط بيضا فالسما دي معديه حالا اهووو.

المهم نبدأ كلام اولا صباح الخير ثانيا انا واحشني اكتب اوي ومكنتش متخيله اني لو قعدت فترة مبكتبش حتى لو كان الكلام اي هبل وخلاص ان الموضوع فارق ولا هبقى واحشني اكتب ودا شيء اظن انه خير يعني. 

في سؤال بيلف في دماغي انهارده هو ليه الناس بتحب تزايد على بعض يعني ليه لازم الشخص اللي انا بتكلم معاه دا يكون عنده مشكله افظع من اللي انا بحكيهاله على طول الخط ، يعني ليه لما اجي احكي لاي حد عن اي حاجه لازم يقولي وانا كمان عندي المشكله دي ، هو فعلا احنا واصلين لدرجه من الفهم او الشبهه بينا وبين اي حد معدي عشان يبقى هو كمان عنده نفس المشكله ولا احنا شبهه بعض فعلا !

ساعات بتتفرج على شخصيه معينه في مسلسل او فيلم او روايه او حتى اغنيه مثلا بتحس انها شبهك اوي اوي يعني بطريقه تضايق! بس مش بتحب تقول لحد انها شبهك. اولا عشان ميقولش وانا كمان وانت بتبقى عارف كويس انها ملهاش علاقه بيه يعني مش شبهه خالص او انه ممكن يحسسك انك مش لاقي حاجه تعملها واي حاجه تيجي قدامك تبقى شبهك ودا مش صحيح ، ثانيا عشان محدش يفهمني ، مبحبش حد يفهمني! مع اني بحس اني اصلا مفضوحه لوحدي ولو مش مفضوحه بفضح نفسي بنفسي عادي جداااا. 

المهم انك طول عمرك بتتفرج على افلام وبتسمع اغاني وبتلاقي "حاجات" شبهك في بعض الشخصيات ، بس في شخصيه واحده هتلاقيها شبهك كلها على بعضها بكل تفاصيلها ، ولو انت حواليك ناس متابعينك هيقولك انهم كمان بيحسو ان الشخصيه دي شبهك.

يعني مثلا في فترة كدا ظهر فيها فيلم الباب المفتوح وكل الناس بتتكلم على اد ايه الفيلم او الرواية شبههم و ان ليلى دي نسخه منهم ، لما جيت اقرأ الرواية مكنتش عاوزة ليلى تبقى شبهي عشان لما حد يقولى حاجه عنها مقولوش وانا كمان! 

بدأت قرايه واتصدمت ليلى فعلا شبهي دي حتى شبهي شكلا ، انا قعدت مندهشه ازاي "لطيفه الزيات" جابتها بالوصف الشكلي كدا مش بس الشخصيه لأ دا حتى الشكل ، اول مره كاتبه تجيب البطله "مليانه" و"عنيها ضيقين".

حسين جميل جدا بس في الحاجات اللي خلى ليلى تحس بيه ، لما قعدت افكر في الشخصيه لقيت اني مش معجبه بيه عشانه هو لا انا معجبه بيه عشان نادرا ما بتلاقي شخص فاهمك وعارف انك عندك الاحسن بس انت مخبيه ، الحد اللي بيفضل ينعبش جواك عشان هو عارف انك عندك حاجه حلوة اوي بس عشان ظروف كتير يعني الحاجه دي اتكتمت جواك لحد ما انت كنت فاكرها ماتت ، حسين مش شرط يكون الحبيب ممكن يكون الصديق يعنى في اي مكانه هيقدر يوصل الاحساس اللي ليلى حست بيه ، اصل حسين مكنش بيعمل كدا مع ليلى عشان هو بيحبها ، هو كان بيعمل معاها كدا عشان هي تستحق تبقى احسن وتستحق تحس بقيمه نفسها. 

اكتشفت اني الحمدلله عندي حسين في حياتي بس بنت ، بنت حلوه اوي اوي بجد بتعرف تلاقي الحلو اللي جوايا بتعرف تخرجه وتصدقه وتخليني اصدقه ، اي نعم لسه مش قادرة افتح الباب عريضا على مصراعيه بس انا متاكده انه وقت ورزق يعني احنا بنسعى في الدنيا عشان نوصل اللي يخلينا نعرف نفسنا كويس ونبقى متفقين ومنسجمين معاها.

ليلى الشخصيه اللي فعلا شبهي ، مع اني محبتش قبل كدا بس انا عندي عقده من الحب زي العقده اللي عملها عصام لليلي بس مش بنفس الطريقه يعني ، المهم دايما اقول لماما انا مش بثق في الحب اصلا ولا واثقه في الرجاله كلها ، قالتلى ربنا يبعتلك اللي يرجعلك ثقتك فيهم ويعوضك خير ، ودا اللي حسين عمله في ليلى عشان تقدر تحبه رجلعها ثقتها فيه الاول وانها عادي ممكن يكون اختيارها غلط بس مش معناه ان الكل غلط ، ليلى طلعت عين حسين بجد الرواية الوحيدة تقريبا اللي حسيتها واقعيه او طبيبعيه دايما بيتقال ان البنت لما حد يقولها انه بيحبها بتحبه على طول وبتقع في غرامه بقى وان البنت سهله وكلمه بتوديها وكلمه بتجبها ، احنا اه كدا بس في منا اللي بيعمل دا بمزاجه يعنى ، وفي منا برده اللي مش طالب من الدنيا غير ان اللي يحبه يبقى عاوزة زي ما هو بدون تغيير بدون تظبيط ودا اللي مبقتش بشوفه في الواقع.

من شويه كنت بقلب في التلفزيون لقيت مسلسل خاتم سليمان ، دكتور سليمان كان نفسى يكون عندي في حياتي واحد زيه ، بغض النظر بقى انه يكون ابويا او اللي ممكن اتجوزة في المستقبل ، الشخصيه دي احلى حاجه فيها انها ماشيه في كل الاتجاهات اب وزوج وحبيب واوقات كتير ممكن يكون ابن كمان. عموما بحس ان الصاوي مكنش بيمثل اوي فيه يعني فيها جزء من شخصيته خصوصا بعد ما سمعته في برنامج بيحكي عن نفسه حسيت انه شبهه. يعني في حد في الواقع اهو يعني الموضوع مش صعب اوي كدا.

 بحس دايما ان لما بيكون في بنت حلوة من جواها وعندها ابداع في مكان ما حتى لو ابداعها دا في نظرتها الإيجابيه للحياه وللكون وتحس انها فراشه كدا من جواها ، لازم تتجوز واحد يموت الحس دا ، والعكس لو ولد برنس في نفسه كدا ودماغ وصاحب مزاج لازم يتجوز واحده تنكد على اللي خلفوه ليه بقى ليييييييييه.

ليه مثلا الحلوه متتجوزش الحلو ويعيشوا يحبوا في بعض ، ليه ميفرحوش ببعض باختلافهم سوا ليه دايما لازم يكون في واحد عاوز يدمر التاني. مش عارفه كلام غريب ساعات بحس اني انا بس اللي شايفه كدا لاني اصلا متعقده من الموضوع كله على بعضه. نفسي اكون غلطانه ويكون في فالكون دا اتنين بيحبوا بعض عشان شايفين الحلو بس اللي جوا بعض وراضين بالوحش كمان لان مفيش حد كامل ومش طالبين من بعض اكتر من انهم يبقوا في مكان واحد قاعدين جنب بعض ومستمتعين بالكون سوا.
ليه مفيش سمكه بتعشق حوت يعني هما الاتنين سمك ليه الحوت ميشوفش ان السمكه دي رقيقه وحلوه وملونه فيقرر يكون رقيق معاها ويحبها زي ما هي ومتكونش نهايتها انه ياكلها لانها مش هتقدر عليه !