بقالي مدة مكتبتش أي حاجه خالص، كان وحشني أكتب بس مكنتش لاقيه كلام!
كل فترة بفضل في صراع فظيع مع الإكتئاب "مبقتش بحب أعترف بأنه أكتئاب عشان مكبرش الموضوع" فالاخر هو اللي بينتصر للأسف يعني..
المشكلة مش فأن مين ينتصر ، المشكلة الحقيقية بالنسبالي فهل اصلا يستاهل !
الصراع الحقيقي اللي بيحصل جوايا بين اني مضايقه من حاجات معينه او فاقدة لحاجات معينه وبين الحاجات اللي عندي فعلا !
عندي حاجات كتير حلوة وحاسه بيها جدا ومش نكراها بس في لخبطه جوايا مش قادرة مشوفهاش مش عارفه أحلها..
عاوزة ابعد عن الناس ابعد بجد زي كدا اللي بيلم هدومه ويقرر يعيش فكهف لوحده خالص ، بقيت بقفل السوشيال ميديا على طول ، المشكلة ان التعود بيتعبني.. التعود جحيم.. لما اتعود اني لوحدي مبعرفش ارجع تاني وببقي مكلكعه من التعاملات كلها..
انا وحشه اوي الفترة دي وحشه بجد ، بقيت أحس ان طاقة الناس اللي بيحبوني خلصت كمان بقيت احسن ان خلاص محدش هيستحملني للدرجة دي !
كل كوم وأمي كوم.. انا معرفش هي حاسه بأيه من ناحيتي الفترة دي حاسه بيا فعلا واني نفسيتي فالارض ولا مش واخده بالها من التعب والشغل..
أنا انانية أه انانية جدا بجد بس مرهقه والله مش قادرة حتى أقرر ولا أفكر فأنا مفروض اعمل ايه عشان أبقى كويسه..
جوايا اسباب كفاية اوي بالنسبالي اني ابقى كدا بس للاسف مش قادرة اقوله لحد ولا لنفسي.. فمهما حاولت اقول مش هقول.. ومهما كتبت مش هرتاح..
انا فعليا مفكرتش فأي حاجه بكتبها دلوقتي غير اني بفضي شحنة غضب جوايا عشان نفسي انام وانا حاسه اني فاضيه نوعا ما..
يارب انا تعبت من ان اللي جوايا مش برايا او ان اللي برايا مش جوايا يارب قوينا على الأستمرار يارب قدرنا منكنش ثقل وهم على قلب حد..
