انا مبعرفش ارشح لحد فيلم حلو يشوفه خالص والله .. امبارح دخلت سينما ف طبيعي جدا اتسأل ..الفيلم كان حلو؟ طب رأيك ادخله ولا لا .. دايما ردي قاطع الفيلم حلو او وحش "بالنسبالي" معرفش انت ظروفك ايه
في ناس موهوبين في الموضوع دا .. قدرات بقي تقوله عاوز فيلم يعجبني يعرف يقولك اسم فيلم واضح وصريح
روحت البيت لمدة يوم عشان اشوف صحابي .. البيت بقي مهجور حقيقه لا يمكن انكارها .. بس سريري لسه محتفظ باحتواءه.. خطفت ساعه كلام مع ماما اي نعم اتكلمنا في نفس الحوار اللي بنتكلم فيه بقالنا سنه بس المهم محدش قطعنا كالعاده .. بس الحقيقه التي لا يمكن انكارها برده اننا لم نعد كما كنا والبيت لم يعد كما كان فالحمدلله
امبارح لعبت مع اصحابي لعبه اننا نفاجئ بعض بسؤال والرد يبقي ف ثانيه .. فسالت سماء انا بنسبالك ايه قالتلي ضهر فقولتلها ازاي يعني قالتلي لما بعك او بضعف ببقي عارفه انك هتفوقيني وهتسنديني فانا الصراحه اتفجأت جدا مكنتش متخيله ان علاقتي بسماء واصله لهذه الدرجه فالحمدلله
اجازة نص السنه بتخلص وكل حاجه هترجع لمكانها .. نوم وصحيان بمواعيد وشغل كتير لازم ابدأ ارضى واعيش في الواقع ان مفيش راحه في الدنيا ومفيش حاجه كامله ولو انا مبسوطه بحاجتين لازم يبقي قصادهم حاجه مش على مزاجي .. ربنا يعينا ويقوينا
النوم اجمل حاجه في الدنيا ودي اهم الاكتشافات الوجوديه .. يارب بكرا يوم جميل بإذن الله
من فبراير 2016 لـ فبراير 2017 .. السنه دي غيرتني 180 درجة ..
انا ادعكت دعكه محترمه محترمه اوي يعني الحمدلله ..
قعادي هنا باسطني بنسبه اكبر من انه ضايقني او بمعني اخر انا مش مضايقه بس من حين لحين بفتقد احساس الخصوصيه اوضتي سريري دولابي حاجاتي دماغي سهوله الحركة والمواعيد والالتزامات والنوم براحتك والصحيان وقت ما تحب اعمل اكل واشغل فيلم وانا مش دارسه عواقب الموضوع..
بس ايجابيات برده كتير من اهمها ان بابا اتغير معانا "ابعد حبه تزيد محبه" ربنا يهديه يعني ويجعل كلامي خفيف عليه .. حاليا مقدرش اقول انه تغير نهائي لاني معرفش لما نرجع هل هترجع ريما لعادتها القديمه ولا هنكمل حلوين كدا؟ ربنا يسهل ..
بقيت بعمل اختراعات في المطبخ واتجرأت اني اجرب وادوق الناس ومخافش من ردود الافعال على اكلي وبقيت بكتب الطريقه وايه حلو وايه مظبطش المرداي وايه محتاجه يتظبط المره الجايه..
لما تعبت اسبوعين مدخلتش المطبخ البيت اتكركب وبقوا عمالين يقولولي خفي عشان مش عارفين ناكل ومش لاقين اكل عدل وبقوا يجيبوا دليفري لغاية ما مبقاش في فلوس..
رغم ان المطبخ وقت ما مبتبقاش قادر تعمل حاجه بيبقي حاجه مقرفه جدا تعب واجهاد بجد لكن انا مبسوطه باني انتصرت على بعبع المطبخ والحوض اللي مبيخلصش.. آه وآه ويا فرحة قلبي كنت طير وصبحت مراكبي ^_^
نسيت اقول ان خالتو بقت بتقولي ان طبيخي زي طبيخ ستو *ستو دي جدة مامتي بس كل الدنيا كانت مجمعه انها استاذه فالطبيخ*
بس قعادي هنا والمسؤليه واني مبقتش ملك نفسي ليها سلبيات برضه اني بقيت بكسل اخرج بره القوقعه عشان حاجتين اولا التعود لما حد بيجي يشيل عني شويه للاسف الموضوع بعد كدا بيبقى صعب وبقعد كام يوم مضايقه ومتعصبه من اني هرجع تاني للروتين..
مبقتش برسم ولا بكتب ولا بعمل اي حاجه ليا بس مش مضايقه بالقدر الكبير يعني .. مبسوطه اني وسط الناس دي كلها انا بعمل اللي عليا وربنا مقدرني على دا وخلاص .. ربنا عاوزني هنا دلوقتي وعاوزني اعمل دا دلوقتي فانا هعمله وهحاول اعمله على احسن وجه.. بضايق من نفسي اني بقيت شويه عصبيه لا مش شويه انا بقيت عصبيه جدا على الناس بذات اللي فالبيت بقيت سهله اتعصب وبقى ليا ردود افعال من العصبيه يعني انهارده لما اتعصبت وانا فالاوضه برتب الهدوم قعدت اخبط الهدوم جامد جامد .. اكتر حاجه مضيقاني الفتره دي العصبيه لازم استحمل اكتر من كدا لان ربنا مش بيحملنا فوق طاقتنا .. يا معين يا رب
بقى عندي احساس غريب ان الكتابه متعلقه بالحزن معرفش ليه يعني بقى فدماغي حاجه لا إراديه انا عاوزه اكتب ف افتش عن الكآبه اللي جوايا .. عاوزة اغير النظرية دي .. وعاوزة الاقي حاجات احكيها كتير مش عارفه ازاي بس هفكر انا ودينا :D
ممتنه لربنا اوي اوي على كل حاجه حصلتلي السنه دي ومهما شكرته مش هيبقى كفايه .. ممتنه ليه على كل دقيقه بحس ان معيته محوطاني ولطفه شاملني وبتأسفله على كل حاجه اضايقت منها وهو قاصد بيها خيري .. ربنا يقويني ويصبرني وياخد بأيدي.
ممتنه لربنا جدا على وجود ماما .. ودينا وندى ويارب يديمهم نعمه حلوة وسند ليا في حياتي كلها .. ويارب ابقى عامله اللي عليا مع جدتي رغم العصبيه وكل حاجه لسه وحشه فيا .. الله كريم
* معرفش اشمعنى الأغنيه دي بذات بس هي دايما بتسعدني وبتحسسني باني بقيت أقوى "لجل ناوي العمل الصالح" "اعدل الدفه على البحري همتك يابو قلب جميل"
