صديقتي العزيزة بعد التحية واللذي منه انا اكتشفت اني في العادي بحب اوجه كلامي لشخص معين او احس اني بتكلم مع حد حتى لو الكلام دا مجرد كلام مكتوب ولذلك اسمحيلي اتعامل معاكي كصديق مراسله وخصوصا اني نفسي في صديق مراسله من ايام ابتدائي ، الشخص اللي اكتب واقوله كل حاجه وهو على قدر الامكان ممكن يرد عليا بس مش مشكله الفكرة كلها في اني اقول وخلاص. وبما انك أقربهم لقلبي وأكثرهم فهما لما يدور في ذهني وعلى درايه كامله لما يجول في خاطري هحاول اتخيل اني بوجهلك الكلام دا عشان اعرف اتكلم واقول!
انهارده يومي بدأ لطيف صحيت بدري أخيرا بعد ما كنت فقدت الأمل في الصحيان بدري ، قمت صليت وبعدين رجعت السرير تاني في محاوله لاستكمال النوم خصوصا ان في حالة صداع مسيطره عليا بقالي ما يقرب الأسبوع مش راضيه تفارقني ، لذلك قولت انام على أمل ان الصداع يخف شويه بس مأمكنش.
ماما صحيت بعد مدخلت احاول انام فضطريت اقوم بقى ، قمت عملت فطار هي الغزاله كانت رايقه "هموت واعرف ايه العلاقه بين الغزاله والروقان" عملت فطار حلو يعني كنت معجبه بنفسي قطعت طبق سلطه جزر وخيار وطماطم والألوان كانت عجباني جداً ، حمرت طعمية في الفرن ! لاول مره وطلعت حلوه جدا !
وبعد ما أكلنا انا وماما عملت قهوة بقى عشان نفوق كان بقالي فتره مبشربش قهوة بلبن بس شربت بقى اخيرا. ماما اتبسطت بالقهوه برده وانا بنبسط لما حد بينبسط بقهوتي ^_^
قعدت افكر في زمان فتره لما ماما سافرت تعمل عمره انا كنت صغيره اوي يعني لدرجة اني مش فاكره كانت امتى بالظبط هو انا كنت في ابتدائي مثلا ! المهم اليوم دا جه في دماغي اوي سرحت فيه ، يوميها روحنا وصلنا ماما وخالو وخالتو للمطار وجدتي كانت معانا ومروحين على البيت عندنا وجدتي قعدت معانا الفترة بتاعة سفرهم كلها ، انا اصلا متعلقه بماما بشكل مخيف يعني واساسا فضلت لفترة طويله بنام جنبها كانت بنسبالي مصدر الامان وكمان هي الوحيده اللي كانت بتعرف تتعامل معايا وانا صغيره ، كل العيله بتقول اني كنت عنديه ومبسمعش كلام حد غير ماما ، ففكرة ان ماما تسافر وتسيبني كانت مدمراني يوميها انا فضلت اعيط اول ما ماما غابت عن عيني في المطار وعشان يمشوني فضلوا يقولولي هنجيب بيتزا "بيرشوني يعني" وانا اصلا لما ببقى في مواقف زي دي استحاله اي حاجه تعوضني اللي انا حساه يعني بنسبالي كلامهم كان ولا حاجه ! لما روحنا المفروض اني انا هنام مكان ماما عشان جدتي هتنام مكاني ، انا لسه فاكرة احساسي لغاية انهاردة انا لما دخلت انام لقيت "جلابية" ماما اخر حاجه كانت لبساها قبل ما تسافر متعلقه فاخدتها وفرشتها على السرير عشان اشم ريحتها وانام.
يوم لما رجعوا من السفر كان قبل الفجر وانا كنت نايمة وصحيت على صوتهم هي وخالو وخالتو جم على البيت عندنا وانا قمت جري من النوم على حضن ماما كانت جيبالي عروسه شبهي اوي كان شعرها بني فاتح اقرب للاصفر وكيرلي وكانت لما تدوس على ايديها تسجل والايد التانيه تقول اللي سجلته كانت احلى عروسه جتلي في حياتي وكانت عندي لغاية السنادي وبعدين قولت اديها لحد يلعب بيها بدل مانا ركناها وهي اصلا حالتها بقت صعبه.
السفر على اد ما بنتمناه في العموم الا انه فكرة مخيفه جدا للناس اللي بحبهم ! فكرة التعلق بحد لدرجة تخوف حاجه بشعه وحاجه تخوف فعليا.
المهم في النهاية اليوم قلب درامي جدا وجبت القديم والجديد وقعدت اتكلم كتير لغاية لما صدعت جدا وبعدين حضنت ماما فهديت شويه وقعدت اتناقش معاها في موضوع الحضن واكتشفت اني تقريبا عندي افكار مختلفه عن الحضن ! المهم انه في حاجه دافيه كدا دخلت جوايا خليتني احس اني واخده مهدئ.
**انهاردة لقيت على تمبلر واحد عامل #تحدي_30_يوم_كتابه على اد ما فكرة الكتابه اليومين دول مصدعاني جدا الا ان فكرة التحدي عجبتني وهحاول استمر 30 يوم كتابه يمكن تجيب نتيجة ! :)
انهارده يومي بدأ لطيف صحيت بدري أخيرا بعد ما كنت فقدت الأمل في الصحيان بدري ، قمت صليت وبعدين رجعت السرير تاني في محاوله لاستكمال النوم خصوصا ان في حالة صداع مسيطره عليا بقالي ما يقرب الأسبوع مش راضيه تفارقني ، لذلك قولت انام على أمل ان الصداع يخف شويه بس مأمكنش.
ماما صحيت بعد مدخلت احاول انام فضطريت اقوم بقى ، قمت عملت فطار هي الغزاله كانت رايقه "هموت واعرف ايه العلاقه بين الغزاله والروقان" عملت فطار حلو يعني كنت معجبه بنفسي قطعت طبق سلطه جزر وخيار وطماطم والألوان كانت عجباني جداً ، حمرت طعمية في الفرن ! لاول مره وطلعت حلوه جدا !
وبعد ما أكلنا انا وماما عملت قهوة بقى عشان نفوق كان بقالي فتره مبشربش قهوة بلبن بس شربت بقى اخيرا. ماما اتبسطت بالقهوه برده وانا بنبسط لما حد بينبسط بقهوتي ^_^
قعدت افكر في زمان فتره لما ماما سافرت تعمل عمره انا كنت صغيره اوي يعني لدرجة اني مش فاكره كانت امتى بالظبط هو انا كنت في ابتدائي مثلا ! المهم اليوم دا جه في دماغي اوي سرحت فيه ، يوميها روحنا وصلنا ماما وخالو وخالتو للمطار وجدتي كانت معانا ومروحين على البيت عندنا وجدتي قعدت معانا الفترة بتاعة سفرهم كلها ، انا اصلا متعلقه بماما بشكل مخيف يعني واساسا فضلت لفترة طويله بنام جنبها كانت بنسبالي مصدر الامان وكمان هي الوحيده اللي كانت بتعرف تتعامل معايا وانا صغيره ، كل العيله بتقول اني كنت عنديه ومبسمعش كلام حد غير ماما ، ففكرة ان ماما تسافر وتسيبني كانت مدمراني يوميها انا فضلت اعيط اول ما ماما غابت عن عيني في المطار وعشان يمشوني فضلوا يقولولي هنجيب بيتزا "بيرشوني يعني" وانا اصلا لما ببقى في مواقف زي دي استحاله اي حاجه تعوضني اللي انا حساه يعني بنسبالي كلامهم كان ولا حاجه ! لما روحنا المفروض اني انا هنام مكان ماما عشان جدتي هتنام مكاني ، انا لسه فاكرة احساسي لغاية انهاردة انا لما دخلت انام لقيت "جلابية" ماما اخر حاجه كانت لبساها قبل ما تسافر متعلقه فاخدتها وفرشتها على السرير عشان اشم ريحتها وانام.
يوم لما رجعوا من السفر كان قبل الفجر وانا كنت نايمة وصحيت على صوتهم هي وخالو وخالتو جم على البيت عندنا وانا قمت جري من النوم على حضن ماما كانت جيبالي عروسه شبهي اوي كان شعرها بني فاتح اقرب للاصفر وكيرلي وكانت لما تدوس على ايديها تسجل والايد التانيه تقول اللي سجلته كانت احلى عروسه جتلي في حياتي وكانت عندي لغاية السنادي وبعدين قولت اديها لحد يلعب بيها بدل مانا ركناها وهي اصلا حالتها بقت صعبه.
السفر على اد ما بنتمناه في العموم الا انه فكرة مخيفه جدا للناس اللي بحبهم ! فكرة التعلق بحد لدرجة تخوف حاجه بشعه وحاجه تخوف فعليا.
المهم في النهاية اليوم قلب درامي جدا وجبت القديم والجديد وقعدت اتكلم كتير لغاية لما صدعت جدا وبعدين حضنت ماما فهديت شويه وقعدت اتناقش معاها في موضوع الحضن واكتشفت اني تقريبا عندي افكار مختلفه عن الحضن ! المهم انه في حاجه دافيه كدا دخلت جوايا خليتني احس اني واخده مهدئ.
**انهاردة لقيت على تمبلر واحد عامل #تحدي_30_يوم_كتابه على اد ما فكرة الكتابه اليومين دول مصدعاني جدا الا ان فكرة التحدي عجبتني وهحاول استمر 30 يوم كتابه يمكن تجيب نتيجة ! :)
