اولاً وقبل الكلام احب بس انوهه ان انا كان عندي مخططات كتير لليوم ده وكنت بحاول جاهدة اكون معاكي فيه بس انتي عارفه الظروف اكبر مننا.. ثانياً انا بقالي يومين بفكر هعمل ايه في حدود المتاح بقى عشان احتفل باليوم ده معاكي وانتي الـ my person ولازم اكون قد المقام يعني 😊 صحيح احنا بقالنا كام يوم مفيش تواصل جامد بس "انت في القلب مقيم" يعني ومبيفرقش معانا الحاجات دي..
نتكلم جد شويه.. في الواقع احنا نعرف بعض بقالنا حوالي ٧ سنين تقريباً اللهم بارك يعني؟ بس الصراحه اخر سنه بتهيقلي اكتر سنه قربنا فيها من بعض وفهمنا بعض اكتر وبقينا في حياة بعض اكتر.. انا مبسوطة بكل التغيرات الايجابيه اللي في حصلت في شخصيتنا السنة دي واننا بقينا بنواجه الحياة سوا وبنحاول ننبسط رغم حقد الحاقدين يعني.. بصي هو انا الصراحة مش محضره كلام وكده يعني انا حاليا فاتحه وبكتب اللي بيخطر على بالي اقوله ف متستنيش توصلي لحاجه فالاخر عشان انا برغي باللي حساه يعني 😁 انا عارفه اني الفترة الاخيره انا وحشه جدا نظرا للظروف اللي انا فيها بس وجودك في حياتي الفترة دي مخلي الدنيا احلى كتير.. انا بحبك جدا جدا وبحب كل الحاجات اللي بنعملها ونعيشها سوا كلامنا وافلامنا ومقابلاتنا الاخيرة الغيرمتوقعه بالمره واغانينا وعمرو ديابنا 😍 مش عاوزة اطول اكتر من كده بس عوزاكي تعرفي حاجه بسيطة يعني وانتي بتقرأي الكلام ده الكلام ده ولا اي حاجه من اللي جوايا ليكي ف متحاوليش تحسي ان ده كل حاجه لانه مش 1 % حتى منه.. انا حاسه بعجز شديد اني مش عارفه اعبرلك بطرق اخرى لان ما باليد حيله يعني..
وفي الختام كل سنة وانتي انتي بكل انفعلاتك وبكل كلامك وطريقتك وحياتك واسلوبك كل سنه وانتي حلوة زي ما انتي حلوة وكل سنه بنتغير للاحسن في الحاجات اللي عارفين انها مش حلوة فينا وبنغيرها وواخدين بالنا من التغيرات دي في بعض كل سنه واحنا سوا يارب العمر كله نكون سوا ونكون عون لبعض على الحياة ونكون صحبه خير وحب وسلام ونكون المكان الدافي اللي بيلمنا اخر كل ليله عشان نحكي ونشكي ونبكي ونحب ونهون ونطبطب على بعض قبل ما ننام.. يارب ايامك وحياتك كلها في سعاده ورضا من ربنا عليكي ويارب اشوفك دايما سعيده ومتهنيه ومشوفش فيكي حاجه وحشه ابدا ابدا يارب.. ربنا ميحرمنيش منك وتفضل دايما نسمه هوا لطيفه في حياتي 💕
